main russian english yakut even Ньока нгонмирални гяки культуратан нян хупкучинтэн ичукэтти обсерватория Ньока нгонмирални гяки культуратан нян хупкучинтэн ичукэтти обсерватория
Бюро ЮНЕСКО в Москве Ньока нгонмирални гяки культуратан нян хупкучинтэн ичукэтти обсерватория



menu

  Анңамта тэлэңэл


  Олонхо – Ньока героическай эпосан


  Культурнай наследиел


  Ньока төрэңэн ңөнмирэлни огантан нян нимкантан музеян


  Ньока республикан ңөнмирални культуратан


  Культура нян искусство сфералан хупкучин


  Культурнай туризм


  Научнай муюссэн


  Төрэн политикан


  Хупкучэк нян культура


  Культураду анипча публикациял


  Фотогалерея Слепцова Спиридона (sachaja)


menu_right.gif (79 bytes)
menu_bottom.gif (201 bytes)



Фрагмент книги В.А. Роббек "Фольклор эвенов Березовки"

Рецензенты: доктор филологических наук В.В.Илларионов

кандидат филологических наук, .лауреат государственной премии РФ А.Н.Мыреева


Утверждено к печати Ученым советом Института проблем малочисленных народов Севера СО РАН


Архаическая часть сборника выполнена в рамках

интеграционного проекта СО РАН № 81

«Архаика тунгусского фольклора»


Составитель: д.ф.н. Роббек В.А.

Ф 75 Фольклор эвенов Березовки (образцы шедевров) /Департамент по делахМ народов и федератив. отношениям РС(Я), Ин-т проблем мапочисл. народов Севера СО РАН; сост. д.ф.н. Роббек В.А. - Якутск, 2005. - 362 с. + цв. вклейка.


Эвены Березовки - это одна из этнических групп эвенов, которая сохранит самобытный образ жизни, богатую материальную, духовную культуру.

В данный сборник вошли лучшие образцы устного народного творчества особой энической группы эвенов Березовки, сохранивших до настоящего времени традиции, обычаи и уникальный тмпимилированный эвенский язык. В пего включены оригинальные тексты выдающихся сказителей И.А.Бу лдукипа, А.И.Хабаровской, Л.И.Тарабукиной, Е.Н.Булдукина, Е.И.Балаганчик, К.П.Тайшина, С.Е.Дьячкова и др. В основу книги легли фольклорные материалы, собранные В.А.Роббеком с 1959 г.


ISBN 5-902148-1)2-2

УДК 398 (=512.512) ББК 82.3(2рос=Эвы)-6

Институт проблем малочисленных народов Севера СО РАН, 2004

Тексты:

Амму икэн

Таракам акнилбу ач асиңасал биситэн, теми тарак асиңалгавур гадатан гөникэн хөнтэтки стадатки нуддывун. Нөсэгчэр биситэн. Амму нөн асиңан ачча одын. Тар теми ач гяла бисин. Гяган гадавур Сивергидэтки хөрривун, гя стадала. Акму-да ач асиңна бисин. Акму асиңган гадывун. Тадук нян гяла стадала ңэнривун, таракам-такан бакалдыридюр эвиденритэн, хэдевэттэ адыв-да инэну эникэн дэрэмкэттэ. Илам-да инэну тачин-та хэюкуденнөттэ. Нян гя стадатки хөррөтту эйдучэндюр. Тар хэдедникэн нян дагрит тэггөтгэ нян икэдиллөттэ. Тарак аммун дялни биситэн, тарак гиркэлни өмэтгу бичэлни нөсэгчэрэптукун биситэн тарал асиңалтан, дөр бэй — Петр Николаевич нян Иван Федорович. Ноңартан асиңалбутан гадыди хэден. Тарабукина Евдокия Прокопьевна бисин — Петр Николаевич асиңан. Нян Иван Федорович асиңан — Анна Афанасьевна. Ноңарнюнтан өмэтту хэден тимина окан — дөрбу инэну, тар нян дэрэмкэттэвур тэгридюр икэн амму:

Адай гявсаяна дэлминесэкэрбур тинмыденрэкэтэн

Энэ-дэ-лу нодыча чивэдыду

манадутын хэпкэнэлдэмэл-лэ

Аналчав дялысай тэлбэй хаскарсига евкэкий

Нисидяндаку нюмэкундулий холалшшй

Нян хэлбэдендэку тэлбэй хаскара евкэкэчэму

Куракукан хунэнңий курапкивул тэлэкчидин

Аналчав дялысай тэлке мойкара хискагналрым

Куңалтаки икэгрэдэку, алмаградаку. Света дөр анңанаңан бисин, Маша илан анңанаңан бисин, Сеня-да. Таракам бу забою илбэривун Березовкала. Тала Василий Кононович, эньму нөн Владимир Пантелеймонович. Забой оддакан хөрэдилривун нян амаски стадаткивур. Амму хөнтэлэ өриңчирин. Таракам муну иранудай Хакандятки бадикар эмрин, бу нудиннэвун амаски. Эдлэвун-дэ яр-да мунтэки эмрин амму. Эсу нудды нян эмрэкэн амму. Тар хөрудэвур ячавур өңкэритэн.

— Тимина нуддэвур.

Таракам тар икэчэвэн минтэки алмадаку гөнни:

— Эди хикутывчигрэкил. Икэгрэли, — гөнни амму, — куңалтаки алмаградас, эдэн бэриптэ би көкэрэку, тарав алмаграңанри. Тарав хамалкаридюр ноңартан-да тачин эвигрэдэтэн. Хи эрэгэр икэв алмадгарали. Нян амму икэрин эчин:

Өтэл бадикар хулбуй мукрий дэгэнэку хэпкэнив

Нян намнариву хуликилби иранудай

Эмдэккэнди хэмрэснив теккэл Сенекэе

Бөнкэкэелэ иснадяндир

Би-дэ-гэл иснаддим.

Хулбуй мукрий дэгэнэку айкидкидати өрэснэн,

Якамгал тайками биптуй төний дармынчилрин

Эмдэккэндий хэмрэсниву

Якамгал тайками биптуй төний дармыкчинри

Хотарани дёраниван биптуй төний дармыңчинри

Хулбуй мукрий дэгэнэку төний дармыңчинри

Эрэклэ иснариву

Ями эр Масилий ада палаткан илаттан

Эркы ями илачанрын хиткилэ ирэгьикнэй

Хулбуй мукрий дэгэнэки өнерэм

Тек-тэ терэннөн эрэиддын

Мулкиръелэ ирэгжнэй

Хулбуй мунрий дэгэнэку

Хурэлби дюлэргэтэн

Хятиг ирэги нирявинчай нөсутэлрин

Хжидин нөсупкэлридюр дюлиргэтэн

Эрэв огукаву хомгиграңанри

Эдэн коларнур-а.

Эчин нимэгнэдь эмрэкэн-дэ икэвэттэн. Нимэгнэдилнюн икэмэчиддөттэ.

Нян-да амму икэн:

Эрэккэл төлбилкэе талалкан бичэ бимнэн

Чимкэндее якчавур тэлбэй хаскара евкэккэму

Хаскай муңрикэн якчайвуму

тэлбэй мунрикэм намруккаму

Горчив төлбиву танниккаму

Малнандяя яңчавур

Тэлбэй хаскара евкэккэму Чимңяндее яңчавур

Яңчилрыкатан хэбдекэддэ

Горчив төлбиву танриңкаму

Хаскай муңрикэм танриңкаму

Кавилңа көңнэтэннөн оңкудадим

Кавилңа көңнэтэннөн оңкудадим.

Хабаровская Анна Ивановна, старшая дочъ И.А.Булдукина




АМАКАН-КАГЫНА

Амакан-Кагына утаканюми (атикаңнюми) нян илан асаткар хурэлнюми биддэ.

Өмнэкэн тугэниду иманраңатан далила манудын. Утакан экэнтэкий хуттэкий гөнни:

— Дя, гэ, мөв коламан як. Имнали аю иманрав.

Экэнтэн хутэн имнан. Тэгэлэ элим бакран. Колади эрэсэндэй некэсчилрин, нян эгден дэтлэ хиняман иттин. Дагрит ясали дендин кясапраснан, укал гусэтэ ниридун дэгэддымэки мэддэн. Дюлан алачидянра.

Илилатан инэңнэ Кагынкан гөнни:

— Дя, экэнсэн яла хөррэн? Як мөв коламан. Гэ, хи-нян манрули, иманрав имнали. Айдинри-вул он-да.

Гяңан хутэн имнан. Экми удьлин удидиснан. Эр, ями хэрукэн дэсчин, нян эгден дэги дэтлэн удин, нярисанчан иманрала ичун. Хоңникан, иманадилдай некрэн. Кусалам доддан өйгич. Дэтлэ хиняман ясали дендин кясапран. Укал гусэтэ никандулан тэгэттимэки мэддын. Дюлан-дамар алачидянра, хоңникар. Кагынкан гөнни, хоңникан:

- Дя, эрэк экнилси он од? Яла бэриптэ? Хину-гэл этэм хнрукэн, оламач көкэдэку, — хэргэчэми хунади дыллон талникан гөнни.

Илитан инэң одни. Ями неркэ икэн илрэн: Амакан-Кагына Хэргэвус хутус-э Би-нян яруда-ку Амакан-Кагына Экэкэлсе хурэлсе Төнгэрчэн хэрлэн-э Икиричэртэн гябучидянра Амакан-Кагына. Кагынкан утаканюн хулрачардулавур гөбөнукэн:

- Дя, як некрэн-э? — гөникэн.

Хуклэснэ. Бадикар мялра, неркэлэ дэкчэкэкэн дэсчиниикэн-дэ мян тарав дептэ. Нян-да икэңэн неркэлэ илрэн. Нян-да мэлэлридюр хулралдулавур гөбөнукэн. Хуклэснэ. Мялра. Нян-да дэкчэ дэсчин неркэлэ.

- Эрэк як-ут-та муту аисчин, дебдэт бөттэн, — Кагынкан

Дебэснэ дэкчэв. Нян-да иливран икэн неркэлэ илрэн. Утакан Кагынканюн неркэетки көетникэн, хоңникан гөн:

— Иду ичуридун бөдип-э? Як некрэн? Икэн исни:

Амакан -Кагына

Хэргэй-е хути

Минду бөле

Амакан -Кагына.

Экэкэлсе хурэлсе

Төңэрчэн хэрлэн-э

Икиричэлтэн гябучидянран

Амакан-Кагына.

Коровакакан-а бисэм-э

Тэлдэкэндулэе көегпле

Амакан-Кагына.

Кагынкан төлэски нөн. Ями эр хякитала корова нанрачанни Ириди гөнни:

- Дя, этиду-тит ичур бөсөгэ-э. Он-да индулэ исчин. Хулиңо, гэ, хи имнасчили нян, - хэргэткий хуттэкий гөнни.

Хэргэн хунадин нодкакан бисин. Хөррин. Эр экнилби хэрукчэлбутэн бакран. Дэтлэ ңярисанчаван-да удю иттэн. Ноңан-да тек имнадай кимран. Дэтлэ иггөн долдан. Дагрит ясалди кясапрун. Укал гусэтэ никандулан бисий мэддэн.

Эрэк икэдды эңэе, нод хуркэн бичэ. Төми Кагынкан хурэлбэн көериди, нян хэргэвэн хуттөн эелрин. Төми-дэ кэнели хоми бэйдук тесчидэй манрурин. Гусэтэ амардадун, чукачакакан одыди, дэгэлрин. Дэгсэкэн эгден нам өйдэлин хо ургэ чукачаяканду, гусэтэ ичуридун дэгэсчиддэн.

Эр нам букчандулан хо эгден дю илаттан. Тарак төлдэлин асачакар хогнар. Хунңитан хамаддадинни исни. Эр дюдук нөн тек дэгчэ асаткан, хоңникан. Эгдем екэмкэру аран, ургэтникэн, төксэн. Көкэннэй хами, мэни хоңанникан, гиркан. Амардадун, өйдэдун ноңандулин чукачаякан дэггвгтэн.

— Гудее, хи-ткэн яв-да эникэн хар дэггөчидинри, би-ткэн гек-эт, төңэрлэ эвдим, — хоңникан хивалчин.

Чукачан ноңан мирлэн дон. Эгден төңэр, чөнин химңэлрэн гардала. Асаткан хөлилэн ңэнриди, чөчириди хоңаниддан:

— Гудее, аммуя-да ядда-вуч тек? Би биддыву яв-да эстэн хар, як-та мину этэн бэлрэ, — тачин гөниди, хукусандай некрэн. Ями дюлдэлэн хо нрд хуркэн хэкэркинни:

— Аси, би хукудаку, — гөнни, — нян эюмкунь хукуснан милтэрэ мөв. — Тек эрэв ңэнули дютки. Нян гөңэнри: "Яч хотынри? Яв гөвэттэ энтэкэе хо бисивус. Яч-та ач көкэнэ осивус?". Эйду укчэнэкэн улгимиңэнри, — тачин гөниди, асаткан хунмэлэн, инңат одыди, набганни.

Асаткан мявми чөлкэсэнчэч мөв төкэснэн дютки. Ичэлэн, ойкэе-хунңи, анчиндулай хамалдыдникан, тэгукэнни. Нян гөнни:

— Ями хину ңи-дэ этуримдэс? Он эрэк хи уинри төңэрдук?

— Як минду-быди бэддин? Хинмэ ховус эскэвэттэкэтэн ослриди манруми эр уюрам ардай, айдиту-гу эскэвэттэ? — асаткан барагран.

— Эр айдит кубэтгукутэн хинмариву хину нодлис, тек-нян мэр| эчус-тэ иттэм. Тар-лу, айдит гөнэнри, ңи-дэ миндук хоми, хо бэй эрэк буг долан ачча. Тек-мэ, ями-вуч ою хоснин, ңи-вут-тэ миинюн тэрлэндэй некрэн, — гөнни бэйкэе.

— Ңи-си хиннюн тэрлэндин, хо бисэкэс? Ач-та көкэнэвус нолдаграриву. Айдит-ку тачин? — асаткан гөнни.

— Тачин-а, — барагран бэйкэе, — мин хову хоял хар. Мин көкэму ңи-дэ этэн бакра, — гөнни ининникэн.

— Эсэм ач көкэнэ бидэс тэдеттэ, — асаткан гөнни.

— Мин аяврив бясаку оми, тарав хамалкадинри, — гөнни бэй.

— Этэм бясакас од эдлэй унур, он бэй ач көкэнэ бивэтгивэн, — асаткан хилгэрий хан.

— Гэ, би хинтэки гөндэку, — бэйкэе икэлрэн хоч хопчач дылганди:

Хэрикку-хэрэддэй,

мингэл-дэ имөй!

Ңи-дэ эсни хар-а!

Тар нам хөлилэн.

Накгпынкаму няникла,

Тарак-нян хурэлэн,

Итшняну-этумкэву

Тарак урлэн-э, дөр

Иин — буликэтынэл бои

Хэрикку-хэрэддой.

Хуркэн инңат олбаңчири төлэски тэгэлэ чуңчириди, төбөридук чукачан олбаниди, дэгэлрэн нам хөлигдэткин. Эр ями, няникла ңаңты аркуттан. Икири олбанвди, ңанты хуткалин чуңчириди, хурэлэн нөн. Ңанты хурэлэн итикня курэкинэддэн. Хэпкэниди, ман. Урчэмэн хөкин. Ями тала дөр буликэтэл. Тарав наласнан.

Бэйкэе тачин-та хамалдаддан, мэни эскэникэн. Хуркэн инңат олбаңчиникан чуңчин. Икэривэн долчиддыди, хэкэркиниди, унтундулэн буликэтэлбу делдуналран. Бэйкэе гөңэс хэткэңчин. Көкэн.

Асал хан хоңалра, бэйкэев айчисчиникан, хан-да ининникэн чоканчилра. Хуркэм эрэли ноңантакин өрэлдэлрэ. Бэйкэе коюрэкэн-тэ нам-да, төңэр-дэ ачча одни. Төңэр хэрлэн бэил көкэчэл икирилтэн кялбариңчир, хан-да хурамаддыл. Хуркэн холута нөкин-дэ, тарич нэмкэн — эйду хэкэркиттэ, арридюр.

Өрэп асаткан-да экнилни арридюр, хэкэркиттидюр, хокаңчилра. Хуркэн мукалралбу авландула нөриди нэмкэттэн — орар од. Этэргэрбу мукалрадук нуриди, нэмкэттэн — кэлмэлни од. Нулгэснэ. Дагрит нулгэридюр Кагынкандула исса. Ирэкэтэн, хоңандур улэвур набганчал. Хурэлни эвэлдэникэр илракатан утакаптаки гөнни:

Эниңэ, хоңридукут коритат-та-тит аричилран, — коритчарби көркикрэн.

Ама, эне, эсу аритта, — хунадилтан гөн, — эр, эмру эйдудюр.

Эниңэ, хоңгридукут, ясалалти-да-тит аричилра — ясалчарби өткэчэчэнди асукут хучикрэн, одуканмы.

— Ама, эр, матаккавур-да эмуру, муну айчав Нюнуев, — гөн хунадилни.

Таракам-мак тэден Кагынкан. Нян хуркэн икэлрэн:

Амакан -Кагына,

Хэргэе хути,

Минду боле

Амакан- Кагына!

Төңэрчэн- Чониндя,

Хэрдэдукун,

Асаткам хутусэ,

Ургириво!

Амакан-Кагына.

Таракам Кагынкан хуркэчэңчин мэлуңчин учэндукий колкас.

— Эр тек ин бидэн, — гөнни. — Эвэчи-тек эр ху аич ичилдэлрэ!

Аич бидилрэ, тек-тэ нимкандула биддэ.


ТАРАБУКИН Н.П., п. Черский, 2002 г. Записал Тарабукин П.Н.




ЧУКАЧАН

Чукачан биддэн. Чукачан чукачантаки гөнни:

- Чукачан, колдаку мөлэли, чипи-пи-пи-пи.

-Этэм мөлэрэ, чипи-пи-пи-пи, окатла-ккы тикчим, чипи-пи-пи-пи.

- Хяттук-ка дявдинри, чипи-пи-пи-пи.

- Ңалу-кка нилтардин чипи-пи-пи-пи.

- Кукатладинри-кка.

- Кукатму-кка насардин, чипи-пи-пи-пи.

- Эньми инмэндединкы хаңандинри, чипи-пи-пи-пи.

- Эньму инмэнден нян муктардин, чипи-пи-пи-пи. -Акми агандядин хурэгдинри-ккэ, чипи-пи-пи-пи. -Акму агандян нян чилдундин, чипи-пи-пи-пи. -Аканси агандян тарак тарбач илэ, чипи-пи-пи-пи -Акму агандян мунтэрэлэ хинюттан, чипи-пи-пи-пи.

- Гяңас нян мунтэрэс илэ?

- Гяңлай мунтэрэлэй хинрив, чипи-пи-пи-пи. -Гяңас-ка тэрмис илэ?

- Гяңлай тэрмилэй хинрив, чшш-пи-пи-пи. -Гяңас-ка тугэсэкэс илэ?

- Гяңлай тугэсэклэ хинрив, чипи-пи-пи-пи.

- Гяңас-ка чорас илэ?

- Гяңлай чоралай хинрив, чипи-пи-пи-пи.

- Гяңас-ка хеңкурэкэс илэ?

- Гяңлай хеңкурундулэй урулнив, чипи-пи-пи-пи.

- Гяңас-ка урурунси илэ, чипи-пи-пи-пи?

- Гяңлай урурундулэй урулнив, чипи-пи-пи-пи.

- Гяңас-ка элбитиңэс илэ, чипи-пи-пи-пи?

- Гяңлай элбитиңнэй урулнив, чипи-пи-пи-пи.

- Элбитиңилси илэ гяңлай хинчас, чипи-пи-пи-пи?

- Нэкулэй нэкурив, чипи-пи-пи-пи. -Тарбач тарак нэкус илэ, чипи-пи-пи-пи?

- Нэкув дури дурурин, чипи-пи-пи-пи. -Тарак нян дури илэ, чипи-пи-пи-пи?

- Удан хивирин, чипи-пи-пи-пи. -Тарак удан илэ, чипи-пи-пи-пи?

-Удам тарав оңалган колрин, чипи-пи-пи-пи.

- Тарак оңалган илэ, чипи-пи-пи-пи?

- Тар наму бассаки дэгэлрин.

Мугдэкэнде хэетэннэн донрин,

Буңнякалды, буңнякалды,

Дыңнякадды, дыңнякалды,

Наму бассаки дэгэлрин,

Оңалган колрин, чипи-пи-пи-пи.


ХАБАРОВСКАЯ А.И., п. Березовка, 1985 г. Записал Роббек В.А.




 

2006г. © ЦНИТ ЯГУ, АГИКиИ
Сайт создан при поддержке Бюро ЮНЕСКО в Москве.
Сведения и материалы, содержащиеся на данном сайте, не обязательно отражают точку зрения ЮНЕСКО.
За представленную информацию несут ответственность авторы